Some people put up sick Xmas 3s

Dec 04, 2018 Dem Boys Seh, Features / Columnists, News

Dem boys learn Xmas preparation does begin in November. Late shopping does start December 15.
Courts start de Christmas tree light up in November. Marriott follow last week. De tree at Rahaman turn light up last week and get knock down de next day.
Dem raise it up back and it look different from all de rest.
Drive down to town and you will see anodda tree, this one deh inside de rent a tent compound.
Dem boys laugh when dem see de tree. It look like when yuh put a big jersey pun a fine foot tall man. And de jersey end by ee knee.
Bank de turn, and you end up at Banks DIH. Dem gat two Christmas tree. One shape like dem foreign girls who come to Guyana and de odda one look like it got polio.
De only thing that come close to looking like Christmas is de decoration around de tree trunks in de Banks yard.
Giftland Mall got a tree that some people describe as a beer belly man or a big belly woman.
De Waterfalls paper got one too wha de boss man light up. Dem boys shame fuh talk bout it but in fact de tree look like if it got diabetes.
Every morning when de staff came in is either some of de leaf fall off or de lights fall deh pun de ground.
De Big Market paper got one that tie up wid string and look like it got strokes.
City Hall was to put up one but de Clown Clerk carry way de money and de Town Clown get throw out.
Ohh Pee put one without lights because some Ministah thief off de lights fuh carry home.
Jagdeo got de biggest and brightest Christmas tree. Dem boys ain’t got access to wheh he live but one of he neighbor seh suh.
De neighbor seh every night he tun on de whole village does get low voltage. Anodda neighbor seh ee confuse wid Christmas and Diwali.
Dem boys seh Nicolette should go home by him and give him a lecture between Christmas and Diwali.
De only thing is that she does mix up Diwali wid Phagwah. She like Sam Blinds who wear dhoti to go to an Eid function and he put on an African outfit to go to attend a jhandi.
Talk half and ask Soulja Bai to bring a decorator when ee coming back from Cuba.

Discover more from Kaieteur News

Subscribe to get the latest posts sent to your email.

Latest News