De Chat 3 lost his way yesterday

Nov 24, 2018 Dem Boys Seh, Features / Columnists, News

De Chat 3 was talking a lot de odda day. He is de loudest talker in de party because he believe he is de brightest person when it come to law. That is why anywhere Jagdeo go he does walk wid de Chat-3. Sometimes he does talk out of turn and since he can get lock up now that he is not president he does rely pun de Chat 3.
Is de closeness he share wid Jagdeo that mek de Chat-3 believe that he gun be de presidential candidate fuh he party come 2020. And he really campaigning.
He tekking de case fuh all dem farmers who got a problem and ee telling dem that dem only got to pay a small piece.
But when dem boys ask him he does tell dem how he ain’t getting pay, how he wukking pro bono—that mean wukking fuh free. Anybody who know de Chat 3 would know that he wouldn’t spend he own money to travel to anywhere fuh free.
He wouldn’t stand up in court fuh free because he is de one who always seh time is money. But dem boys seh de only time he got to stand up in court fuh free is when he got to face de magistrate fuh dem law books de people seh he carry way.
In he defence he seh de Donald Dumb give him; Donald seh he can’t remember. He seh he remember giving him something but he not sure is books.
Dem boys and de Chat 3 know that if he get convicted fuh stealing books he can’t be de presidential candidate. He can’t even be a MP.
He is a man who know anything and everything. He did know and he tell people how Moses was planning to tek over if Soulja Bai didn’t mek it.
Wha he didn’t tell de people was wha de magistrate woulda tell him yesterday. Dem boys seh when de magistrate announce he must lead a defence about de law books he lef wid he mouth open and motionless.
He didn’t want lef de courtroom. Is de orderly touch him and seh “Counsel, you got to go out de court.”
Dem boys hear when he go downstairs de whole afternoon he stand up in de courtyard wid two people—Euclid Gomes and Glen Hanoman.
De court empty, all de magistrates and de workers lef de courthouse and he was still standing there.
Talk half and wait fuh see wheh de Chat 3 gun stand up after de next court appearance.

Discover more from Kaieteur News

Subscribe to get the latest posts sent to your email.

Latest News