Voter refuse to scratch up Patsy face

Nov 13, 2018 Dem Boys Seh, News

GECOM spend a whole lot of money pun Local Govt Elections. Before that, everybody keep meeting and rally telling people to vote fuh dem. Yesterday when dem boys go to de polling station to see wha happening dem realise nobody didn’t tun up to vote.
One man tell dem boys when he go in de polling and he see Chase Green face pun de ballot paper de man just fold up de paper and refuse to vote.
He tell dem if GECOM wouldn’t a count when he dig up she face as a valid vote he woulda dig up she two eye and scratch up she face pun de ballot paper.
Dem boys see dem neighbour lef early to go and vote. Not long after, dem see she come back wid a lang face. Suh dem boys ask she wha happen. She tun and tell dem de people had de nerve to put Patsy hard face pun de ballot. She seh she just suck she teeth and walk out.
Everybody know is 500,000 been pun de voters list. Results ain’t come out yet but dem boys want throw a bet. No more than 50,000 people cast vote throughout de country.
Dem boys want to tell you de reason fuh this is because of de wholesale thiefing from tap to battam. One letter writer put de whole thing in perspective.
He talk bout de firefighters who went to render assistance to de passengers in case of fire on de crash plane. Instead dem help people, dem help demself.
Dem start thiefing from de front of de plane and walk through cleaning up every seat and every overhead locker.
De man wha write de letter seh dem firefighters only follow the example of all our leaders in government past and present.
De man seh wid firefighters like dem when you house on fire the best thing to do is lock the door and let everything burn.
People does bring out articles and put dem at a safe distance for safety. Then dem does go back for more. By de time dem come back wid de second set, de first batch gone.
This bring shame to de whole country. CNN and BBC and many international news agencies report on de plane crash and de thiefing.
De CNN report how de firefighters should be de first responders. Instead, dem tun out to be de first removers. As fuh de BBC report de firefighters enter de plane as firefighters and come out as vacuum cleaners.
Talk half and know that one more hour and de plane woulda tun a shell.

Discover more from Kaieteur News

Subscribe to get the latest posts sent to your email.

Latest News