Guyana voting to put back some clowns today

Nov 12, 2018 Dem Boys Seh, Features / Columnists, News

Today is Election Day, not a day fuh change govt but fuh change councils, Town Clowns and Clown Clerks.
Georgetown gat a Town Clown who is de longest serving councilor. Ever since Noah build ee Ark de clown been deh.
Dem boys get a shock when dem hear de clown going back. She expect to be Town Clown again. She don’t mean to give anybody a chance. She like Jagdeo.
Dem boys seh de two of dem should share a cell fuh all de pain and suffering dem put de nation through.
Remember de parking meter scandal? De Town Clown and de Clown Clerk end up in Mexico pun a joy ride. When dem come back and dem boys question dem, de Clowns tell de nation how de people buy first class ticket fuh dem and carry dem just to show dem wha parking meter look like.
Thank de Man above fuh exposing de corrupt transaction that woulda mek Georgetown people feel de end of de shaft.
That’s not all. De Clowns sell out state lands that didn’t even belong to council. Dem lease private people property and pocket millions.
De clowns didn’t have money to pay dem poor city council staff but dem could fine millions fuh pay fuh portable toilets fuh a security guard.
Dem boys seh it took a commission of inquiry to mek de nation know that de clowns had more security than Donald Trump.
Through de same commission de nation find out that some of de security had illegal guns. Only heaven can tell if dem use to go out and stick up people when de night come.
Imagine one of de clowns send a woman fuh thief out some books and ledgers from ee office. De clown tell she dem books wha she couldn’t fetch out she must tear out de pages.
Dem boys seh dem do nuff selfish, evil and wicked things and still gat de nerve fuh ask people to vote fuh dem.
Well, dem boys want to mek it clear to dem, dem rather vote fuh a dog, a cat or a donkey than these clowns
Talk half and decide if you gun live wid de results after today.

Discover more from Kaieteur News

Subscribe to get the latest posts sent to your email.

Latest News