Three men mek dem boys remember Exxon

Jul 14, 2018 Dem Boys Seh, News

Dem got three men pun de front page dat everybody know very well. Dem boys had to think long and hard before dem coulda put dem picture so bold pun de front page.
These is men who mek nuff people run mad and some commit suicide. These is men who mek a prince tun a pauper.
Dem boys seh these men resemble dem oil company wha come to Guyana, wha come to torch de treasury. One of de men resemble Exxon, one resemble Hess and de third resemble CNOOC.
Dem boys believe is de same three men who clean up L. Seepersaud Maraj jewellery safe in Stabroek Market. De police ain’t got no doubt. Dat is wha de police seh.
Dem boys seh just like how Exxon is de only company dat can drill in ultra deep water, dem is de only three man who can cut open ultra thick safes.
Since dem get ketch, dem men get new false name. One name Ex-hand—he got to be de drill man. He drill open de safe.
De odda one name Hessle. He is de one who hussle out de market wid de jewellery. De third one name See-Knock. Every safe he see, he want knock and be part of. Dem boys hear is he arrange de knack-in dat, land all of dem in jail.
Soulja Bai like grant pardon, especially to young people and de very old ones. When he hear de story, he ask who give dem three old men de contract to cut de safe. He want to give a notice to de family. Don’t ever come to him fuh pardon any of dem.
De police do a good job fuh ketch dem. Dis is three people who didn’t leave a trace when dem do de job. Dem enter de market like ghosts and de mek de jewellery disappear like ghosts.
Dem boys believe dat de court gun mek dem disappear from society like ghosts.
Talk half and wonder if de police find any jewellery…

Discover more from Kaieteur News

Subscribe to get the latest posts sent to your email.

Latest News