A li’l boy seh Jagdeo too old

Jul 01, 2018 Dem Boys Seh, Features / Columnists

When tiger lost he stripes is a bad thing. Dem boys remember old policemen who retire. Retiring is a nice thing fuh de first couple days but after bout two weeks, is not easy to wake up and do nutten. That was de case wid dem old policemen suh dem use to get up and go to dem police station and sit down whole day.
Is de same thing mek some people does go and look fuh wuk. Some of dem does tun Minister because dem got to wuk. That is why dem boys always asking de government to extend de age of retirement. Of course politicians not interested in that because as a politician you only got to retire when you can barely walk.
When people young de age of retirement does look so far. That is why when Jagdeo was young he didn’t think about changing de age of retirement. Now he got to go into retirement and he kicking up. He announce to de world that he ain’t going nowhere.
When a bull got to go to slaughter house, it does kick up and fight. Is de same thing when a man going to jail. It does tek nuff prison wardens to drag him through de prison gate. That is wha happen this week. Ram Son announce that is time Jagdeo retire and he, de young man, tek over.
One war start. Jagdeo seh Ram Son can’t talk suh and he got to learn that is only one big man dem got in de party. This time de Chat-3 and Irfaat and Frank ain’t saying nutten. Dem waiting to see how de feathers gun fly.
Well dem boys see Ram Son stand and push up he chest to Jagdeo. “You can’t talk to me like that. You days done.” That is wha Ram Son tell Jagdeo. De boy seh that fuh long he always hear he got to respect he elders. That is wha hurt Jagdeo. De boy calling him an old man.
Dem boys waiting to see wha gun happen in Round Two.
Talk half and see de Freedom House fight pun de big screen

Discover more from Kaieteur News

Subscribe to get the latest posts sent to your email.

Latest News