Don’t rush de local content legislation

Jun 21, 2018 Dem Boys Seh, Features / Columnists

Love all. Trust few, Everything’s real but not everyone is true. Soulja Bai got to realize this. ExxonMobil come to Guyana and smile wid Jagdeo. As soon as Jagdeo lose de elections dem run to Soulja Bai and hug him up.
De hug up was real but Exxon wasn’t true. Soulja Bai is yet to recognize that Exxon still planning to get more than its due.
Guyana trying fuh develop a local content policy fuh de last ten years. Dem hire a man from Trinidad because Trinidad had oil fuh more than 100 years. But this man give dem de worse draft that if Guyana accept it, no Guyanese gun wuk in de oil industry.
Dem boys want to believe that Exxon paying him because everything in de draft paper look like Exxon. One expert seh is stupid fuh Guyana, even thing to rush into wha de Trinidadian recommend.
He seh Guyana already rush into de oil contract and got Exxon cutting and sharing Guyana cake. De man now begging Soulja Bai fuh tek he time wid this local content policy. At least Guyanese gun get li’l more crumbs from de oil industry.
Dem boys seh this is not like de contract wha de Shaat Baccoo order Trotty fuh sign in 2016. When dem boys talk bout de contract Exxon does still get vex.
Exxon like a man who does wear he cap and pull de peak down in ee face and ee collar tun up. Is only thief man does do that. He don’t want people to recognize him and he don’t want he name call anywhere.
Lang time Exxon woulda get away with all de scampishness dem do in odda countries.
Wha thief man fail to realize these days, technology bring about sophisticated ways to skin up people. Dem got cameras; dem got video recorders. You can’t hide.
Down to de hair on you hand does show on camera suh when you pull down de cap expose. Exxon like de ostrich wha got he head in de sand and he behind expose in de air.
Talk half and don’t rush that local content paper.

Discover more from Kaieteur News

Subscribe to get the latest posts sent to your email.

Latest News