De Chat-3 does lie to get in de papers

Jun 12, 2018 Dem Boys Seh, Features / Columnists

Some people does do anything just to get in de news. When Jagdeo was president, he know dat he gon always deh in de news; suh he never use to keep press conference. He use to just walk out he office and meet with people and he gon see he picture in de papers.
He is not president no more and from de time dat happen, he start fuh do nuff things fuh mek de news. Rohee was de General Secretary and he use to meet wid de press every week, suh he been in de news. Jagdeo see dat and he decide dat he gun tek way de General Secretary from Rohee.
Now he got a steady press conference because he know if he don’t do dat, he wouldn’t mek de news.
Well dem boys believe dat is everybody in de whole party stay suh. De Chat-3 now telling nuff lie when he want to mek de news. He tell a lie pun a judge yesterday and de next thing, dem boys know is de whole court system start wondering who right and who wrang.
One lawyer hear when de judge tell de Chat-3 dat he got to file some action if he think things wrang. De Chat-3 either didn’t hear or he believe dat he gon tell a big lie. Some people who always like put he photo in de media believe him and nearly cause no end of trouble.
And de man ain’t got shame. He gon watch all dem reporter and tell dem another lie fuss thing in de morning.
All of dem trying to follow Donald Trump. He always in de news. De world never see a president who mekking de news every minute. Dis time he gone to meet wid Kim Jung Un. Dem boys had to smile because dem two will meet in a room all by demself.
Dem wouldn’t got no secretary, no nutten, just two interpreter. And dem boys certain dat at certain time dem gon chase dem interpreter and de two of dem gon just sit down, look at each other and smile.
Talk half and watch how people does try to get in de news…!

Discover more from Kaieteur News

Subscribe to get the latest posts sent to your email.

Latest News