Aurora Gold Mine get catch naked

Jun 03, 2018 Dem Boys Seh, Features / Columnists

Teacher Percy seh if you tell a lie you going to hell as soon as you die. Dem boys believe Teacher Percy so Aurora Gold Mine going straight to hell.
And dem carrying Eric Phillips wid dem just fuh repeat dem lies.
Dem bring in a plane from Canada and when dem boys see that de gold company throw out de locals dem ask what’s going on.
After all, de contract seh you must use locals once dem can provide de service at a reasonable price.
De gold company tell de nation how dem ain’t feel safe using local air carrier.
Dem got to be joking because Prince Harry come to Guyana and he fly all over de country wid dem same local carrier wid Teacher Percy inside.
He didn’t think for a moment that dem plane not safe. De British High Commissioner fly all round wid Prince Harry and he didn’t think dem planes wasn’t safe.
It got to be that Aurora is a set of tricksters. Dem was using de same local planes all de time fuh years when things was bad wid dem.
In dem days dem was hustling. Now gold rolling. Dem spent US$30 million pun lighting towers alone.
Dem bring in a fleet of trucks and fuel tankers. Now dem got a plane. When dem boys ask, dem seh how dem buy it. You hear lie? That is lie. When dem boys check dem find out that de plane belong to a Canadian company that providing services in nuff countries and Guyana turn one from last year, de same time de plane come in.
De gold company is a Canadian company. Read through de lines.
Dem move de procurement office from Georgetown to Canada. Now dem shifting all de business to Canada.
Dem boys now got to check if de Peruvian company is fronting fuh Canadians, too. Dem done see Eric Phillips fronting fuh de Canadians.
Talk half and hope Soulja Bai and Jagdeo come out of de coma dem in.

Discover more from Kaieteur News

Subscribe to get the latest posts sent to your email.

Latest News