Greed does lef you like Barabbas

Mar 30, 2018 Dem Boys Seh, Features / Columnists

When people want ketch rat, dem does bait de trap wid wha de rat like best. Some people does put a piece of fat, some does put cheese. Some people like dem who want ketch rat. And dat is why two of dem in jail and praying dat somebody ain’t get mad and bring back de hangman.
Dem get sentence de day before Good Friday, just like Christ. De difference is dat dem ain’t getting crucified today. And de Man above know why although dem wicked.
A lady live wid she husband. De man love she so much dat he carry she to de States when he decide to lef de country. In de old time days, she woulda qualify as de best wife because she could mek plenty children.
De devil always find wuk fuh idle people. Dem had dis taxi driver in New York. He see de woman and he eye light up. De woman see him and she eye ketch fire. She lef she husband and de new man believe dat he get a gift.
Dem boys seh, he didn’t even find out dat he gift was poison. De wife ketch a poor woman and offer she some money dat look like de lottery. Dis poor woman get she son-in-law fuh kill de taxi driver who collect a bright small piece because he did get in an accident. Dat was de bait.
Now neither she nor de wife can spend de money. De taxpayer got to mind dem and all de money dem got ain’t mean nutten. A judge decide dat dem got to live away from people till dem dead.
Is now de first husband thanking he lucky stars because is same way he coulda dead. Dem boys she, de woman do some calculation. She believe dat if she kill de man in de States, she woulda get ketch. Dat is why, sheh kill he in Guyana.
She didn’t bargain fuh de Guyana police.
Talk half and watch how greed does hang you pun de cross like Barabbas.

Discover more from Kaieteur News

Subscribe to get the latest posts sent to your email.

Latest News