Mash fall pun a good day

Feb 24, 2018 Dem Boys Seh, Features / Columnists, News

Mash come and done. People still talking. Nuff of dem jump pun dem plane and come to Guyana because dem hear how things changing. Dem read how Guyana find oil. From de time dem hear dat dem know dat de whole future of de country change.
Bird wife barely wake when de people been pun de road; some was going home to sleep and some done wake up. Dem who did want to mek a hustle smell de rat because dem had some gunman waiting fuh dem. Plus de police was patrolling.
But dem boys notice one thing. Guyanese know how to mek money. De odda night dem had a wake in South. De number of vendors who been at de wake was astonishing. People come out to sell everything and all of dem mek money. De only thing dat was free was de food.
Mash Day was de same thing. Pun every spot people was selling beer, rum, water, soda—de only thing dem wasn’t selling was wha dem ain’t had.
But some things change. Lang time PNC Ministers use to deh in every float, even when de PPP was ruling. Now de PPP ain’t ruling, suh de PPP ministers ain’t even coming out dem house. Dem done wid Mash. Dem boys now want to know if was token presence.
Anyhow, Mash nice. People who don’t come out dem house come out and de sun bun dem. Dem bring out dem children and de same Durban Park wha some people cuss was a savior and salvation. People go and sit down soon suh when de float dem come in, dem had ringside view.
Is a good thing Mash was Friday and people didn’t have to go to wuk de next day. Some man drink till dem fall down; young gyal party non-stop and people who was bruk whole year, spend money like sand. Dat was de money dem thief from all dem people who draw off from de bank.
Next Mash can’t come fast enough!
Talk half and continue de sport till Sunday.

Discover more from Kaieteur News

Subscribe to get the latest posts sent to your email.

Latest News