Jagdeo give Exxon an offer dem couldn’t refuse

Aug 15, 2017 Dem Boys Seh, Features / Columnists, News

People does go fuh interview all de time. Sometimes de question does be tricky and can have many answers. Dem boys know a case wheh a certain man decide that he want a secretary. Four young gyal apply and dem had to answer de same question.

De man ask dem to come in one at a time, then he ask dem de question.

A woman has lips on two different places. What’s de difference? De first gyal seh one is hairy and de other is not. De man seh, “Smart answer.”

De second gyal seh how one can talk and de other one can’t talk. De man reply, “Clever answer.” De third gyal seh, “One horizontal and de other vertical.”

De man open he eye wide; then he seh, “Brilliant answer.”

De fourth gyal tell de man, “One is fuh me and de other is fuh de boss.” Right away de boss tell she that she get de wuk. “You’re hired,” he tell she.

Is a similar thing happen before ExxonMobil come. De boss meet wid Aunty Janet in 1999 and tell she that de company proposal is 25 per cent fuh Guyana and 75 per cent fuh Exxon. Aunty Janet tell him it got to be 75 per cent fuh Guyana and 25 per cent fuh de company. De boss man reject she proposal and he go back wheh he come from.

But wheh sweetness deh bees don’t stay away fuh lang, suh de Exxon boss man come back. This time he meet wid Sam. He mek de same proposal but Sam tell him 35 per cent fuh you and 65 per cent fuh Guyana. De boss man go back, but he eye still pun de oil suh he come back.

This time he meet wid Luncheon. Luncheon seh he is a reasonable person suh it got to be 55 per cent fuh Guyana and 45 per cent fuh de company. De boss man get more vex and he go back. But he come back when he hear Jagdeo is de president.

When he mek de offer Jagdeo seh, “I gun give you de best offer. Fifty per cent fuh you, fifty fuh me… and none fuh Guyana.” That is de contract that tie up Soulja Bai.

Talk half and understand why Jagdeo ain’t saying nutten bout ExxonMobil.

Discover more from Kaieteur News

Subscribe to get the latest posts sent to your email.

Latest News