Soulja Bai got Jagdeo howling wid de Chat-3 as back-up

Aug 02, 2017 Dem Boys Seh, Features / Columnists, News

People know how a dog does protect she pups. If you is de person who does feed de dog she gun tolerate you around de pups but if you is a casual, don’t go near; is trouble. Is de same thing wid de broadcast licence.
Jagdeo release dem licence just like a dog releasing she pups. People who didn’t deserve any, collect but friends and family get de best. When dem boys ask him why certain people didn’t get he and he mouthpiece seh that he is de boss and he decide who get. He sit down in Cabinet and he talk how de Waterfalls paper does cuss him every day. He then tun and tell everybody that if he give de paper radio licence that de Waterfalls boss man gun cuss him every minute.
In public he seh how de Waterfalls boss man got a news paper suh he don’t have to get radio and TV licence. Right away dem boys ask if he didn’t know that when he give Babbie radio and TV although Babbie had newspaper. De man had an answer fuh that.
But dem boys remember how he get vex when people seh he wrang fuh share out radio licence. He put Sityra Gyal fuh cuss out de American Ambassador./ Dem boys seh he should a pick pluck and cuss de man heself instead of using that li’l hot hand gyal.
This week de news come out that Soulja Bai gen tek back dem same licence that Jagdeo give out. Dem boys seh that if dem had dem own way dem woulda tek de licence, de equipment and de money dem mek, then jail some of dem.
But from de time de news come out Jagdeo run out to protect dem puppies. He howl and he get de Chat-3 to howl wid him. Dem start fuh talk bout attack on press freedom. Well dem boys want to know who press freedom people gun attack when dem tek way de radio station from de Pee Pee Pee. Jagdeo never talk bout press freedom when he refuse to give a licence to any other political party.
Talk half and wait fuh more howling.

Discover more from Kaieteur News

Subscribe to get the latest posts sent to your email.

Latest News