Prison escapees put junkies under threat

Jul 26, 2017 Dem Boys Seh, Features / Columnists, News

Now is not de time to be a junkie; now is not de time to be mad man and surely now is not de time do jog or run pun de road. Once you is any of dem things or you do dem things, then either de people or de police gun tek you fuh one of de escape prisoners.
De last set dig a hole like a rat and bore out of de pasture at Lusignan. De police start hunt dem down and before you could seh cock robin seven of dem get ketch. And de police tun up de steam fuh ketch de rest.
Somebody see a man pun de East Coast. De person don’t live in de area but he call police and tell dem how he see escape prisoner. De police corner de man and wid de drugs in he head he mek fuh run. He get one bullet.
Is then de people come out and tell de police that dem now de man, that he is a junkie. And while de people talking to de police de junkie guh to run again. He get more bullet in ee tail. Now he deh in de hospital wheh de doctors fighting wid him.
De dust barely settle when some more people call to seh how dem see to wanted men in de cemetery. De police respond wid speed because everybody ant dem people off de street.
Most of dem commit murder and like de bull and de slaughter house (de animal don’t care wheh he mess when he going to d slaughter house) these escapees got people nervous because dem know that these boys ain’t got problems killing people.
When de police rush into de cemetery is two more junkie sleeping by a tomb. Is a good thing dem was sleeping because if dem did run, don’t ask. Dem boys seh today wasn’t a day to be a junkie or a mad man.
But somebody not thinking. By now dem prisoners either find family and change dem clothes or dem thief some people clothes from dem clothes line. That way dem wouldn’t look like a junkie or a mad man.
Talk half and watch how dem junkie gun keep off de road.

Discover more from Kaieteur News

Subscribe to get the latest posts sent to your email.

Latest News