Soulja Bai hiring dumb asses

Jul 19, 2017 Dem Boys Seh, Features / Columnists, News

Nuff dumb asses deh in public life. Dem deh in some schools but dem deh nuff in parliament. Soulja Bai was going fishing fuh he birthday. Before he go he call de weather man to mek sure that dem will have no rain.
De weather man assure him that there was no chance of rain. Soulja Bai pack he cap and he lunch basket and tell Sandra Gyal, “Let’s go.”
On de way to de Blacka, he meet a man riding a donkey wid a fishing pole in he hand. He ask de man if fish biting. De man tell him “Boss Man you got to tun back and go back home because a huge rainstorm coming.”
Soulja Bai tell de man, “No man. Me weather man highly educated and is an experienced professional. Besides I does pay him big money. He give me a very different forecast and I trust him.”
So Soulja Bai suck he teeth and continue on his way. In a short distance de rain buss and soak he and Sandra good and proppa. He get vex. He puff up he jaw and tell Li’l Joe to fire de weather man immediately.
Then he send fuh de man who he meet pun de donkey and offer him de weather man position. This was a honest man. He was not like Labba Lip and Basil de Willie. He ain’t tekking wuk wha he don’t know.
Suh he tell Soulja Bai he don’t know nutten bout forecasting and that he does get all the weather report from he donkey.
“If yuh see me donkey ears dropping, fuh certain it gun rain.”
Suh Soulja Bai send fuh de donkey. And to this day he hiring dumb asses to wuk in influential positions in govt.
Is dem same dumb asses silent bout everything dealing wid ExxonMobil. De opposition got its share and dem and all silent.
De economy is bad, de country is going downhill; it not producing anything and it importing everything.
De li’l gold, diamond, lumber, li’l rice and de bauxite keeping de country nose above water.
De whole country hear we got oil. That can give people a better life; it can lift dem heads out de water but de dumb asses really dumb. Dem not talking at all.
Dem boys believe de only reason all of dem silent is because dem pocket full already.
Talk half and watch de dumb asses.

Discover more from Kaieteur News

Subscribe to get the latest posts sent to your email.

Latest News