Mek you bed hard and lie down pun it

Jul 17, 2017 Dem Boys Seh, Features / Columnists, News

De fire that bun down de Camp Street jail was a blessing in disguise because all of a sudden Soulja Bai know that he can’t build no more wood jail. Of course when dem white people did build de jail more than 100 years ago, things was under control.
Most of de prison warden was white and most of de prisoners was black. Dem didn’t have ganja and cell phone and fuh sure dem didn’t have too much mixing between prison warden and prisoner. Nobody use to smuggle things inside de jail and all dem who play bad use to end up in Mazaruni wheh de big jail was brick.
Times change and de prisoners smuggle in plenty things, even matches and lighter. That is how dem bun down de jail. Wha Baygon couldn’t do wid all dem bug and roach, de fire do. It even clean out all dem rat wha did live in Werk-en-Rust.
But it was a curse because de same people who set de fire had to sleep in a pasture. And then dem row. Dem boys want to know who gun bun down dem house and then row fuh get put in a hotel?
Is when de rain fall and de pasture gather water that dem prisoners know how bad dem mek things fuh demself. Dem mek bad fuh dem soulja and police who had to watch dem because dem and all had to live in de pasture. And de rain wet dem too.
Things also bad fuh dem who get away. Dem can’t find nowhere to sleep properly. All of dem got red eye because dem got to sleep wid one eye open. That eye red from tiredness.
Then food is another problem. One, one people smuggling food and give dem but even dem frighten. Dem don’t know if de people does eat meat or veggie without salt. Of course beggars can’t be choosers. Who got to sleep in pasture can’t demand fuh sleep in bed.
Talk half and watch how you mekking decisions.

Discover more from Kaieteur News

Subscribe to get the latest posts sent to your email.

Latest News