De Chat-3 begging fuh sympathy

Jul 01, 2017 Dem Boys Seh, Features / Columnists, News

Wha go round does come round. De Brazil President, Lula, wha Jagdeo give de highest national award in Guyana, is before de courts fuh thiefing.
De lady who he install get kick out de wuk and dem trying to jail she. De man who tek over from she and is de sitting president going to jail fuh big time corruption.
In Guyana, De Chat-3 when he was Attorney General, do all de wicked things in de world. And dem boys ain’t talking bout wealth, yet. He, Jagdeo and Donald Dumb do all kind of things fuh get nuff people in trouble.
Dem use to sit down and plan how to imprison people who talk against dem and who stand up to dem.
Dem know de people was innocent of any crime but dem three didn’t care. They were almighty. Now things change and de shoe deh pun de other foot.
Dem getting drag before de court one by one fuh de wicked and corrupt things dem do. Up to dis week a magistrate do a wicked thing. She send a clear message in open court to de Chat-3 that SOCU seeking a search warrant and that he must go home and hide heself.
Dem boys never hear or see any action like that in any court in de world. All over de world dem does do warrant in chambers but this magistrate do de warrant on open court. Then she hold on pun it and tell dem come back hours later.
Dem boys seh de only way this coulda happen if somebody was husband and wife or you paymaster.
Everybady know de Chat-3 and de woman been to law school together and he woulda influence Jagdeo to appoint her.
After all, everybody knows he who pays de piper calls de tune.
Talk half and watch how de Chat-3 tun a spinner.

Discover more from Kaieteur News

Subscribe to get the latest posts sent to your email.

Latest News