Guyana graduate when it come to thiefing

Jun 23, 2017 Dem Boys Seh, Features / Columnists, News

These days everybody does talk about dem constitutional rights. Even Jagdeo get a man to go to court to claim how he constitutional rights affected because Jagdeo sign a law which seh he and no other president can run fuh a third term.
When thief man get ketch and people beat him de human rights people does seh he got rights too. Dem does seh people ain’t got no right to beat him when dem ketch him. Dem seh people must love dem de way dem boys love Jagdeo, Ashni and Brassington.
Is dem same human rights people got thief man using car fuh rob a man wha walking. Three man come in a car from over de river, see a ordinary man walking wid a Nike track boots, stop de car beat up de man, run through he pocket and get a lunch money, a copper chain he had pun he neck, and de man boots.
De one wha haul off de man Nike track boots had on a rubber slipper. Dem boys seh when crime reach to dis level Jagdeo got to smile. This type of crime involving car and track boots never happen in he time.
In he time dem man use to wear Nike track boots to thief car, not car fuh thief track boots. Also in he time he use to give people wuk to thief money. Bee Kay get a job to build 27 bridge in Parika Back dam. He get US$15 million to build dem bridges.
Dem boys damage up 27 track boots to find dem bridges. Dem use seven Nike, ten Addidas, and ten New Balance because dem had to balance demself to navigate through de back dam just to see dem high class and sophisticated bridges.
Dem is yet to see one. Dem did ask Bee Kay and he cuss up. It look like if it is de same thing wid dem well.
Dem boys remember when dem go to look fuh dem well last week dem had to wear rubber slippers. All de track boots did wear out.
De next time dem boys got to check pun any other project dem boys seh dem ain’t spending any money pun footwear.
Dem intend to go straight to State House and pick up Soulja Bai footwear. Jagdeo seh he lef nuff when he move out. Donald foot was too small and Soulja Bai foot too big.
Talk half and stand up fuh you rights.

Discover more from Kaieteur News

Subscribe to get the latest posts sent to your email.

Latest News