Brassington and Ashni nervous

Jun 22, 2017 Dem Boys Seh, Features / Columnists, News

Every day when somebody wake up dem does give praise and thanks to de Man Above. He mek dem see a new day. But it got people who don’t appreciate de day. Dem does do all kind of thing. Some of dem does go and thief and get ketch.
If de person who ketch dem got a good heart, de thief might only get a licking. But if de person got a temper is dead dat thief dead.
Some of de smart ones does run away as soon as dem smell de rat, not Bar Rat. Dem boys sit back and smile when dem hear de one get ketch in Canada. He pack up and go way after he get heself involved in crookishness wid some old scamp. Somebody give him a tip off and he run. He lef he wife and pickney behind.
All dem crook who thief in Guyana does run to de States and Canada. Dem use to be safe because dem country had serious problem wid Jagdeo. Now-a-days once dem ketch you over there is right back you coming. De one who did run and lef he wife getting a free trip back to Guyana; he can’t seh he ain’t got money to buy a plane ticket.
Ashni hear de news and he now getting nervous. He too run and lef he wife and pickney in Guyana and he gone to Washington. When he was running he tell people how he going to de Seychelles fuh throw people off de track. Uncle Sam now got eyes pun him. All SOCU got to do is give de word.
Brassington in Florida in de same boat. Dem boys seh he planning to go to Cuba because Uncle Sam would not go there to hold him and de Cubans wouldn’t send him back to Guyana unless he commit a crime.
Nuff people nervous but dem boys seh de scamps can always run to Brazil and Venezuela. Nobody wouldn’t look at dem two times.
Talk half and enjoy de nervous moments.

Discover more from Kaieteur News

Subscribe to get the latest posts sent to your email.

Latest News