De DEA come and de fun done

May 16, 2017 Dem Boys Seh, News

De boys come out to play. Dem playing so hard that by de time dem slow down nuff people gun lose dem money. Ever since he was president dem Americans ask Jagdeo if he want de DEA and de man seh yes.
De Americans then ask him to provide accommodation but when Jagdeo look around de only place he could find was in Castellani compound. It mean that anybody could attack de DEA from Vlissengen Road. De Americans tell Jagdeo that he want DEA but he don’t want to protect dem.
It tek couple years before de DEA did come and that was when Soulja Bai was president.
Since then is nuff people getting ketch, no matter how dem try to hide de thing. If dem try molasses de people finding de cocaine; if dem try awara, is same find de people finding it.
Dem did find lumber when Jagdeo was president and de people find de cocaine. Now dem try de same trick wid Soulja Bai as president. This time de cocaine did seal up in de lumber. Dem boys know that somebody had to talk. That does happen when people see money and people who does talk fancy and does smoke a spliff. Dem boys hear that somebody actually tip off de cocaine people because some of dem run away.
De Americans trying to cut off all de dribblings that coming in certain people hands. Nuff of this money was floating about pun de road. People was taking it and building big house just to launder de money. Now some of dem same big house ain’t complete because de money ease up coming in.
Is de same thing mek people complaining how business bad. That is why some people want back Jagdeo as President. He is de Champion of Free For All.
Dem boys think there should be a law which seh that when CANU seize cocaine a lot must depend on whether de owner is a taxpayer and does pay VAT. To begin wid, is a case of credit; that mean that somebody gun end up in debt. Since de government care for its people it should help dem wid de debt so it should pay de people fuh some of de cocaine.
Talk half and watch how de tide swing.

Discover more from Kaieteur News

Subscribe to get the latest posts sent to your email.

Latest News