Dem boys seh...De bogus pundits from India com back

Dem boys seh…De bogus pundits from India com back

May 14, 2017 Dem Boys Seh, Features / Columnists, News

People shouldn’t mek de same mistake twice. From small dem have parents who does teach dem children tough love. Some parents does mek dem children feel de heat from a light bulb just to let dem know something hot.
Of course dem got some parents who does tek things too far like a man name Alfred Griffith. He tek he two babies hands and push it in hot water. He deh in jail but none of dem jail man probably don’t know because dem woulda doctor him already.
Last year dem had two people who come from India and fool nuff people how dem can read fuh dem. And of course dem boys know that dem have people who believe that dem got all kind of thing pun dem. One lady believe that somebody bad-eye she suh she go to de people from India fuh cut de bad eye.
But dem boys know that is nuff stupidness. Two people from de Waterfalls paper go to dem man from India as husband and wife. De man from India put dem to sit down, close he eyes and then he tell dem wha happen to dem.
He tell de boy reporter that he should not have sex wid de gyal who pretend that she is de wife fuh twelve days and how dem should go and bathe naked at midnight at de Atlantic. De woman should go one night and de man should go another night.
De next day dem boys visit de man wid another man and before dem could whistle dem two people from India lef de country. Since then, de people from India think that people forget dem and dem come back.
One man done call de people from India and threaten to drop some lash pun dem. Dem boys want to know how much stupid people Guyana got to mek two men run away from de police and then come back.
Talk half and watch how people think everybody stupid.

Discover more from Kaieteur News

Subscribe to get the latest posts sent to your email.

Latest News