Dem crooks getting straighten

May 09, 2017 Dem Boys Seh, Features / Columnists, News

When a judge can come to de conclusion that a court matter suddenly tun a political issue it mean that some people does only go to court to mek political headlines. De judge and Basil de Willie had dem problems in a court. Right away de Chat-3 claim how Basil de Willie threaten de judge to kill him.
De story get big and de judge send a letter to de Chancellor. Is yesterday he tell dem boys how he didn’t complain, that he just report, De Chancellor also claim that she just report to Soulja Bai.
Anyhow, all de problems that people did expect ain’t happen. De judge gone he way but before de judge lef de court, Basil de Willie was frighten. He didn’t go to de court to appear before de judge. When he hear de judge lef de case, he let out he breath.
But is de man who file de case got problems. Carvil decide to challenge Soulja Bai for removing him from service commission. Now he got to wait because de Chancellor got to find another judge and de whole case got to start over.
Dem boys seh that if Basil de Willie got sense he gun behave bad in front of de new judge. He might end up in jail fuh a while but de case gun stall again.
But while he glad to get a judge to hear he case, he got some friends who don’t even want to see a judge. And now that SOCU got 150 of dem fuh pass before de court in a couple of days none of he friends ain’t even going near de airport to come home.
And is now dem boys see why people been cussing Soulja Bai. All of dem who cussing seeing de jail door and dem trying to mek some arrangement. Dem boys know bout de Special Prosecutors. What dem don’t know yet is who gun get prosecute.
Talk half and watch how de crooks getting straighten

Discover more from Kaieteur News

Subscribe to get the latest posts sent to your email.

Latest News