Hay Heff See now checking de marriage certificate

May 05, 2017 Dem Boys Seh, Features / Columnists, News

Teeth and tongue must bite. At de same time when it happen wid other people it does look bad. A man got he wife and people hear dem quarrelling, even if is de first time, de very people gun claim how de two of dem always quarrelling.
Hap New and Hay Heff See get married pun Valentine’s Day. Dem sign de certificate which dem call Herdmanston Accord. De honeymoon barely done and Hay Heff See want to check de certificate.
Of course is a same sex union suh it ain’t a case of husband and wife; is a case of who beg fuss.
Dem boys hear that some people was probing de Hay Heff See to mek life hard fuh Soulja Bai because dem got a problem wid him ever since SOCU arrest Jagdeo.
Rum Jattan and Trotyman corner Moses and dem decide to ask fuh see de Accord. De only reason that happen is because things ain’t going right in de camp. Somebody feel that things ain’t sharing even.
For starters, Moses ask wha happen wid de money that dem collecting from de private tuition. When Soulja Bai ask him if he want put he hand pun it he get vex.
Then Trotyman seh that de oil people might offer him a job. He using that to threaten everybody. He tell Moses to go easy wid de marriage contract because is that mek him tun a Prime Minister and travel overseas free.
Of course, Jagdeo was de one who push de fire because he claim how Moses ain’t got no power. He do till Moses tek crank and that is why he want to review de marriage certificate. He want to see if he can change something and mek Jagdeo shut ee mouth bout de rubber stamp thing.
Rum Jattan only grumbling. He done tell dem that this marriage is fuh keeps and even if de Accord got a li’l glitch nothing is perfect, not even a Victoria Secret panty.
Talk half and watch out fuh more grumbling.

Discover more from Kaieteur News

Subscribe to get the latest posts sent to your email.

Latest News