SOCU tun a barber clipping wings

Apr 25, 2017 Dem Boys Seh, Features / Columnists, News

Barefacedness not you mattie. De country had some leaders who was very rude, heartless and disrespectful.
De Chat-3 do wha nobody else ever do. He tek books wha de state pay for and carry dem home and seh was he own.
How low can some people get? On top of that de Donald Dumb seh is he tell him to tek it. That is how powerful dem was.
One by one, dem who was so powerful and was flying high, getting dem wing clip. Dem foot never use to touch de ground. One of dem, Irfaat, who never believe one day woulda come when he woulda see heself pulling he own suitcase at de airport fuh put through de scanner. He get ketch doing just that last week.
He look like a baggage bai so much so that de Waterfalls boss man nearly holler to him to put on he suitcase too.
De Chat-3 is another one. He was always pompous. He think he was president instead of de dummy, Donald. He use to talk powerful. He too use to have people fetching he luggage and ee law books wha he never buy.
Yesterday dem boys see him crying. Dem didn’t know was a phone call he get from SOCU over dem same law books.
When he get de call, de first person he call was he daddy and he ask de man wha fuh do. He daddy tell him, “Son, don’t walk. Run and go to dem people before dem come fuh you like how dem been fuh Jagdeo.” He then decide to call he partner in crime, de same Jagdeo, that scamp, and he tell de Chat-3 don’t go nowhere.
That mek de man cry more bad because he know when dem did call Jagdeo he run and go quick. De Chat-3 ignore Jagdeo, and run to Jamesey, de SOCU boss.
Dem boys hear he tell Jamesey how he gun do anything fuh don’t get lock up. That is when Jamesey ask him if he know anybody who ever pick up carry way wha don’t belong to dem.
He seh Ram carry away likker by de case. That is why he tek de books by de case.
De same pompous Chat-3 then tell SOCU give him before weekend and he gun carry all de law book, even wha he got in he private chamber.
Talk half and he better keep ee promise.

Discover more from Kaieteur News

Subscribe to get the latest posts sent to your email.

Latest News