People would do anything fuh drugs

Apr 22, 2017 Dem Boys Seh, Features / Columnists, News

De world know drugs is a dangerous thing. Dem have people who would do anything to get it. Some people does sell out dem property; some does risk dem life. Others does risk other people life.
Tek Carol, de Councillor. She risk more than she life. She risk she whole family fuh drugs. She was so hooked on a particular drug that she do strange things. She wake up de hospital wid she strange habits. She would go fuh a first dose at three minutes after midnight and by day clean she gone back again.
By lunchtime she in de ward and by dinner time she tekking another injection. A brave nurse who had no bad intention but wanted to save her life, give voice. And she nearly lose she job. As a matter of fact dem transfer she because de woman is a councillor and she know big ones.
She resign suh she can’t go back to de hospital. She can’t go into de Suh Sex Street drug bond because is sheer condoms in deh. Is only Babby, Jagdeo best friend, can save she.
Dem boys hear he drug got water and he seh is rain water cause that suh she don’t have to worry about dying.
Dem got this other woman who got she man in prison. She now deh next door to him in a different cell, and all because she fetch drug in she crotch to de prison and get ketch.
She mighta get away but de prison officer who see she seh something fishy going on here. Is de same time she husband tek a pull. Fish smell don’t hide. That is wha put de woman in trouble.
Is yesterday when she get ketch dem boys get to know that ganja and fish don’t mix. Ask any Rasta Man.
Talk half and watch how drugs got some people.

Discover more from Kaieteur News

Subscribe to get the latest posts sent to your email.

Latest News