Dem boys willing to tek any polygraph test, Politicians willing?

Apr 21, 2017 Dem Boys Seh, Features / Columnists, News

Yesterday dem boys talk how security cameras these days humbugging people from thiefing. Dem boys call Jagdeo name. Dem seh when he was a li’l boy he mudda use to send him to a store wid a dollar and he use to go back wid $25 ration.
De PPP women organization tek offence and send a letter saying that Uncle Adam and ee boss man claim how Jagdeo mudda teach him to thief. Nowhere in de article dem boys seh Jagdeo mudda teach him fuh thief. But like dem women know something deeper than wha dem boys know. Dem seh how Jagdeo mudda dead among other things.
Dem also seh dem hope when Uncle Adam and ee boss man dead dem don’t vex when people talk dem name.
Dem boys find that very funny. In fact, dem boys got a message fuh dem. We don’t care if dem talk we name now, when we get old or when we get cock eye and dead.
People got a right to talk or express how dem feel about a scamp. Dem boys want dem ladies to know that is he go and pick up de goods from de grocery store and tell ee mudda how de shop owner give him. No way that could be interpret to mean she taught him how to thief. De only thing dem boy vex about is that she mek such a horrible creature.
Dem ladies should also know that is de habit wha Jagdeo got mek he run from he own polygraph machine. Is he bring de machine and seh govt officials exempt. He bring it in to ketch people who was thiefing wha he seh belong to he, he friends and he family. Now he is not a govt official and dem boys know he thief a lot but he continues to talk like a saint. That is why dem want him to tek a polygraph test.
Dem boys want dem same ladies to know that if Jagdeo tek a polygraph test dem would shut down de Waterfalls paper.
Dem boys want dem same ladies to know that dem don’t talk two mouth. Dem giving de same challenge to de new govt. Dem boys remember when all of dem was in de opposition dem was demanding that de govt officials should be de first to face de polygraph machine.
Today de shoes deh pun dem foot. Joe ShanLin now singing Jagdeo tune.
Talk half and wait for another letter from de Pee Pee Pee girls.

Discover more from Kaieteur News

Subscribe to get the latest posts sent to your email.

Latest News