De Chat-3 and Basil squaring off

Apr 16, 2017 Dem Boys Seh, Features / Columnists, News

We get attached to temporary things then wonder why our happiness never lasts. De Chat-3 get attached to de AG Chamber. He get de AG wuk. He was happy till he lost de wuk. He didn’t realize it was temporary.
De new AG behaving just like de Chat-3. He too don’t believe that de wuk temporary and he gun lose it faster than he expect.
De Chat-3 tun and sue de present AG because he claim how de AG tell a lie pun he. Before that, de AG tell de world that he gun sue de Chat-3 because de Chat-3 tell lie pun him. Suh is both of dem sue sue-ing one another. That cause dem boys to seh that de two of dem is like two peas in a pod.
When de Chat-3 start to cry after he lost de wuk Basil de Willie decide to rub pepper in de cut.
He call a press conference and announce how de Chat-3 thief some books. De confrontation continue when de Chat-3 report how Basil de Willie threaten a judge.
Dem boys seh that some people does only talk because if Basil de Willie was serious he woulda done sue de Chat-3. Even de Chat-3 couldn’t be serious because this story bout he and de thiefing books happen a long time.
That is why dem boys seh how de two of dem is alike; that dem is two lyahs. Dem study law and now dem is lyahs. Sometimes people does get so vex wid dem that dem does even call dem liars.
De Chat-3 did tell dem boys that he rich before he was AG, and how de AG wuk mek him poor. He collect some good money from people who he represent. He even use to represent de government before he was AG.
Basil de Willie also is a rich man but dem boys suspect that he don’t have as much money as de Chat-3. What dem know is that de Chat-3 mean to lef him a pauper because de Chat-3 claiming $125 million from Basil de Willie.
Because de two of dem using de court as a playground, dem boys wouldn’t be surprised if Basil de Willie sue de Chat-3 fuh $126 million to cover he cost.
Remember guys, Life is beautiful. One day, one hour and one minute will not come again in your entire life. Avoid fights, anger and speak lovingly to one another and every person including dem boys.
Talk half and buy boxing gloves fuh de Chat-3 and Basil de Willie.

Discover more from Kaieteur News

Subscribe to get the latest posts sent to your email.

Latest News