Man proppa stupid

Apr 04, 2017 Dem Boys Seh, Features / Columnists, News

If is one thing a Guyanese does hear steady is that he stupid. From de time a Guyanese open he mouth, another Guyanese does ask him if he stupid. When a man crack a joke and mek de whole hall laugh, people does laugh and seh how de man proppa stupid.
Dem boys seh it got to be that Guyanese proppa stupid. De definition of a stupid man is one who see de truth, he hear de truth and know de truth, but still believe de lies. Nuff people know how some married man stupid. Dem wife giving dem blow; neighbours know and tell dem; then dem see de man and de woman together, suh dem know, but dem still gun believe de wife when she seh how is she cousin and nutten going on.
Election time is when dem boys does see really stupid people. Dem know Jagdeo very well; dem see he is a scamp; dem hear he corrupt and that he does thief; dem see him and he friends in some shady place, but dem still believe him when he seh how he is de best person to lead.
De politicians dem stupid, but de Chat-3 and Basil de Willie is two who really stupid. De two of dem think dem know more law than everybody, but when you check dem record dem hardly does win case.
De Chat-3 never win a fuel smuggling case and he know that. Basil de Willie, de Chat-3 successor, never win a murder case. In fact, he got de record fuh begging.
Is nuff stupidness in Guyana. A man play wid fyah and never believe that he gun get bun. In fact, nuff people does play wid fyah.
One man write a bogus cheque and believe that he gun get away wid it. He pass de check off on a Friday pun some businessmen.
Another one had he own KSI—that institute that de Pee Hen See use to have. He Know Somebody Inside a bank. De story deh all over de papers.
But dem boys seh that this must be de only not so stupid one, because if he really tek that money, when de dust settle he gun still have money.
Talk half and watch stupidness.

Discover more from Kaieteur News

Subscribe to get the latest posts sent to your email.

Latest News