Soulja Bai got Basil shivering in ee boots

Mar 31, 2017 Dem Boys Seh, Features / Columnists, News

Couple weeks ago dem gold miners, especially dem big ones puff up dem chest and threaten Soulja Bai. Dem hold a meeting and send a message that if Soulja Bi don’t meet dem in couple days dem gun start to shut down.
From de time he get de threat, Soulja Bai couldn’t sleep, not because he get frighten, but because he get vex and he couldn’t put he hand pun de person who send de threat. Dem boys seh that he try to call de meeting just to find out who threaten him, but no miner didn’t tun up.
In de end somebody patch up de story and all was well, then some people decide to cause problem wid de foreign exchange. Soulja Bai call Jordan and de next thing you know all who been keeping dem money under cover suddenly start to bring out some. Dem know was squeeze was coming.
Now dem same miners don’t want to travel to town to do everything that got to do wid de gold business. Dem got to pay tax, but dem don’t want to have to come to town, pay hotel bill and then travel back into de bush. Dem boys know that dem men does only come to town to sport or to spend li’l time wid dem family.
Well Soulja Bai seh he gun put in nuff tax branches in de bush, but dem same miners got to pay fuh dem. Soulja Bai seh that he open couple office to share out passport to save de people from coming to town, but wha dem people save in passage dem got to pay fuh de passport.
De point is that whatever you want you got to pay for. Soulja Bai intend to mek Basil de Willie pay fuh talking disrespectful to de judge.
Dem boys was at a function wid Soulja Bai when dem ask him ‘bout Basil de Willie. Just like when dem boys mother know that she gun deal wid dem is de same message Soulja Bai send.
Talk half and wait fuh Basil de Willie talk to Soulja Bai.

Discover more from Kaieteur News

Subscribe to get the latest posts sent to your email.

Latest News