Luncheon and Edghill starting a drug war

Mar 21, 2017 Dem Boys Seh, Features / Columnists, News

Is easy to find fault and when people find fault dem does find good reason. Volda who tek over from Dr Nutten get into trouble because she arrange wid a Trinidad company to bring in drugs. According to Luncheon and Ten Edghill that is de wuss thing that coulda happen in de country.
Dem boys listen to dem tell de whole world that Volda do sole sourcing. That mean that she tek it pun she self to give Ansa McAl de contract. Is when Volda open she mouth that people realize that was no sole sourcing.
To begin with, was four contract to bring in de drugs and one of de contracts go to Jagdeo best friend Babbie. But if you hear Luncheon and Edghill. Dem never mention bout de three other contract. Edghill talk bout pre-qualification and how that was a good thing when de Pee Pee Pee was in power, but is not a good thing now.
This weekend is Jagdeo turn to cuss out de government. This thing got to be done in turn because if de Pee Pee Pee people and Jagdeo don’t talk now, when dem gone to jail dem wouldn’t get a chance to talk. Dem can’t call press conference in jail.
But dem boys seh Volda is another one. She getting vex when people question she. That is fuh people who believe that whatever dem seh is right. She claim how since she had to buy de drugs she mek one thing and done because no Board of Directors was in place.
That is all well and good. Yet dem boys can’t understand why de Pee Pee Pee vex because Ansa McAl get de contract. Dem know fuh sure that if Babbie did get de contract not one dog woulda bark. But some people use to bring in counterfeit drugs. People used to wake up in de midst of a surgery.
Now Edghill and Luncheon vex. De next thing people gun hear is that Volda tek way de contract from a Guyanese and give a Trini. Dem don’t care bout de shortage that cause Volda to act in de first place.
Talk half and wait fuh another drug war.

Discover more from Kaieteur News

Subscribe to get the latest posts sent to your email.

Latest News