Latest update September 20th, 2026 10:40 AM
Dark shades and blackout mek things ain’t bright
Is Christmas time and people shopping. Dem boys watching de crowds in de streets but when dem ask some businessmen how business doing, dem get de answer, “Things ain’t bright.”
At first, dem boys think was because all of dem businessmen was wearing dark shades. Then dem mind run pun de blackout and believe that was what dem businessmen talking about. From de Wednesday was blackout. People go to sleep in blackout and wake up in blackout.
De people who suffer de most was dem who had cordless phone. De cordless phone is a nice thing. People can walk and talk. Dem can even carry de phone in dem bed and talk till dem drop to sleep and de other party still talking. No cordless phone could wuk without current.
GTT and Digicel mek nuff money. Because of de blackout nobody could get internet so all dem people had to use data. But when de data done, nuff people couldn’t buy more because de seller had blackout.
That is wha dem boys believe dem businessmen was talking about. But when dem go down de road dem see all dem Chinee shop full of people. When dem boys ask dem same Chinee people how business dem seh, “Not bad.”
De people smiling and de City Council decide to ketch some of de money by setting up parking meters. That got laugh because all of a sudden people wouldn’t have a problem finding parking place.
Dem boys seh that dem same parking meters gun mek de businessmen cuss. These meters in front of de people store gun be seen as a deterrent to shopping.
One man tell dem boys that he don’t feel de Christmas spirit. He couldn’t go and collect from all dem business people who try to keep sweet wid Jagdeo. No collection; no big spending so no Christmas spirit.
And de people who get de extra $25,000 seh that dem keeping some fuh de hard guava season that coming. So while some people claiming how things ain’t bright dem got another set.
But dem boys can’t remember any time when dem business ever seh that de Christmas bright.
De thing is that all de complaining none of dem ain’t closing down. Is like dem rather lose money.
Talk half and don’t let dem business people fool you.
Share this:
Discover more from Kaieteur News
Subscribe to get the latest posts sent to your email.
Similar Articles
Website Hits
Blunt of the day
Sports
Features/Columnists
Sir. Ronald Sanders
The GHK Lall Column
Weekend Cartoon
