Don’t criticise when you can’t do better

Dec 13, 2016 Dem Boys Seh, Features / Columnists, News

Dem always got people who know wha good fuh other people. Dem is de people who can give you all de advice in de world. Some of dem does lef dem own business and try to tell you how you coulda been better if only you do something.

De budget debate done but everybody hear Jagdeo talking about wha de government should do and if dem do certain thing then dem gun gain this. Is de same thing he do wid de MPS from ee party. He jump up and announce that de MPs wouldn’t tek de pay increase, how dem gun give de increase to de party.

Then he and he followers know that if dem tax water and electricity than dem gun collect so much money. Then dem got de other set who know that if dem tek de money wha dem giving to sugar then dem can do plenty things.

Yesterday, Edghill, some others and de Chat-3 decide to sit down at de Sleep Out as usual. In fact, that is de Chat-3 watering hole. Any planning session featuring de Chat-3 does involve top of de shelf likker and all does end up at Sleep Out. After de people sit down and start to talk de Chat-3 tek out a cigarette and light up. Edghill tun to he de Chat-3 and ask him how much pack of cigarettes he does smoke a day. De Chat-3 seh four.

And how much bottle of this likker you does drink a week. De Chat-3 seh five.

“What is de price fuh de cigarette?”

“$700 a pack.”

“That add up to $2,800 a day or $8.400 a month. In a year that is just over a million dollars.”

“And de likker. What a bottle?”

“$12,000”

“That is $60,000 a week or $3,120,000 a year. How long you been smoking and drinking?”

“Bout 25 years.”

“You waste more than $100 million and you coulda a buy a hotel.”

De Chat-3 tun to him and ask, “You does smoke?”

“No.”

You does drink?”

“No.”

“Why you don’t have a hotel?”

Talk half and watch dem who like criticize.

Discover more from Kaieteur News

Subscribe to get the latest posts sent to your email.

Latest News