Nuff effing going on in Guyana

Sep 25, 2016 Dem Boys Seh, Features / Columnists, News

People does always remember Christopher Columbus. He sail round de world to prove that de earth ain’t flat. He mek history.
Papa Cheddi mek history too. He tell de nation that de PNC under Burnham and Hoyte, did not only rig de elections. What dem do, if it wasn’t rigging, was frigging. He end up winning de next elections and was GECOM mek he win.
Dem boys want to know if wid all dem things wha going on now wid GECOM, who gun win. Dem boys always remember GECOM been pun Battery Road then move to High Street. Since dem move to High Street people wan know wha dem drink, wha dem smoke to get so high.
When dem been pun Battery Road dem buy battery low. AS SOON as dem move to High Street is everything dem buy high.
Dem buy radio sets at a very, very high price; dem buy toner wha does print paper fuh more than wha a complete printer cost; dem buy pliers fuh cut de wire pun all dem ballot box but de money dem pay fuh each pliers could capon all dem man in Guyana, including de boss at GECOM.
When dem by Battery dem nevah buy nutten. As soon as dem meet High Street dem buy everything; dem even buy battery fuh fly because when dem boys hear de price dem pay fuh a battery dem think was an airplane battery to fly de whole Guyana across de world.
Dem boys seh if all wha go long at GECOM wasn’t or isn’t runnings, dem would join Papa Cheddi and he was frigging.
Wha also going on at GNBA is not runnings, not thiefing but setting de stage fuh a big kickback or kick front. Dem boys hope and pray that when all is said and done it ain’t gun end up as kicking up or kicking down because is big money playing out here.
De money much, much bigger than GECOM.
Talk half and dem boys gun talk about dem Chinee small stone.

Discover more from Kaieteur News

Subscribe to get the latest posts sent to your email.

Latest News