GECOM and Vieira in de same boat

Sep 23, 2016 Dem Boys Seh, Features / Columnists, News

Guyana got some new wheeler and dealer. De country got people who can dance between de raindrops. Dem can talk through two sides of dem mouth. Tony sit pun de broadcast board and when he mek a proposal and everybody tun it down he does go to de people who got radio and TV and tell dem that wha he seh is de new law.
Is de same thing mek he run into trouble de other day. He go pun de Essequibo Coast and approach a man to get him to change he operation from Essequibo to West Berbice. De big problem was that de man didn’t got nobody at West Berbice and he did spend all he money pun de Essequibo Coast.
Dem boys seh is a good thing de man had a tongue in he head and he run to Moses who part de Red Sea and nearly part Vieira head. Now Vieira vex and he thinking bout going to de courts but a lady seh she tek notes and wha de man seh is true. De only thing wha de man seh that hard to prove is that he must move out and leh de gold man who got de TV station to tek over.
GECOM also got some proving to do. It spend $14 million to buy pliers and nippers. At de market price it coulda buy 24,000 of dem things. But dem did only need 2,400 suh dem boys want to know wha dem do wid de rest.
One man suggest that dem clip de Chairman family jewels and wid de rest. But de chairman done seh that dem didn’t buy 24,000 pliers. Dem boys seh that may be true just like how he spend $14 million which is also true.
People who wukking inside GECOM seh dem buy just about 2,400 pliers. If that is de case then dem pay $6,000 fuh a $600 pliers at retail.
Is either somebody rob GECOM or GECOM rob de people and dem boys want to know. Just like how Vieira go to de court is de same way GECOM going to court.
Talk half and watch how GECOM trying to explain how bulk shipment more expensive than retail.

Discover more from Kaieteur News

Subscribe to get the latest posts sent to your email.

Latest News