Check if Babbie don’t own you

Sep 04, 2016 Dem Boys Seh, Features / Columnists, News

Old people does always seh that when fowl eye pass corn is a bad thing. Jagdeo eyes got to pass Soulja Bai. He sit down wheh he deh and seh Soulja Bai words ain’t got weight because Soulja Bai didn’t seh to jail him.
He Jagdeo words had weight, because when he tell he people to give Babbie de well dem couldn’t seh nutten. And when everybody was thiefing he never seh a word. Is de weight wha he words had mek he end up in front of de magistrate.
But de real story is if people got wha dem really think is dem own.
Dem boys seh people got to check dem birth certificate to see if Babbie name deh pun it. Dem also got to check dem transport to see if de house dem got is dem own.
De waterfalls boss man nearly run mad when dem boys tell him that he probably name Glenn Ramroop because Jagdeo try to sell de Waterfalls paper to Babbie. In fact, Jagdeo was planning to sell de whole staff because even Uncle Adam birth certificate get change to Ramroop.
That is wha use to happen in slavery. Dem slaves had to tek dem massa name. De same thing happen wid de well in de Sanata complex. De transport fuh de well change to Ramroop. In fact, dem boys seh people might wake up and find that Ramroop own Guyana.
Nobody can deny that Jagdeo love Ramroop. When he was sick wid de runnings he carry Babbie to Florida to help him select a sturdy plug. When Babbie start to mek AIDS drug, Jagdeo get Ramsammy to tell de gyal who was heading de Food and Drug administration to back off and let Ramroop drug sell.
Dem boys seh that is a good thing de international community step in. De Canada lab seh that de drug was no good and de people in de Caribbean seh de same thing. But imagine how much money de Ministry of Health woulda pay Babbie fuh dem drugs. And nuff people woulda dead. Sandy woulda smile till now.
Talk half and check yuh birth certificate.

Discover more from Kaieteur News

Subscribe to get the latest posts sent to your email.

Latest News