Scamps like wear dark glasses

Sep 01, 2016 Dem Boys Seh, Features / Columnists, News

Was a time when only blind people use to wear dark glasses. That was because dem didn’t want to offend people wid dem eye. Dem glasses was very dark because in any case blind people didn’t need to see anything.
Then couple people start fuh use de glasses because de sun was too bright fuh dem eye. De glasses use to tek off de glare. Then dem beauty queen get into de act fuh de same reason dem scamps begin to wear dark glasses. Dem ain’t want people see dem eye, but dem want to watch people. And all dem politicians is scamps.
Dem want to look at people and dem boys does watch how dem does peep at people. Dem does keep dem head straight but dem does kak dem eye to see who watching dem. When dem see people watching dem that is wheh de problem does start. Dem politicians does start fuh read de people mind. Some people can’t hide dem emotions, suh dem does mek up dem face when dem see certain politician. That is de people de politicians does try to avoid.
But if de person smile, then de politician does try to talk to dem. But sometimes de situation does tun funny, because when de politician see de smile pun de people face is because dem smiling at somebody else.
That happen de other day when de Hay Gee put on he dark shades that had de same colour as he hair dye. He see de woman smile and he try to talk to she. De woman didn’t answer, suh he ask wan wrang because he see she smile at him. De woman seh, “I didn’t even see you.”
But is de dark glasses that does mek dem scamps think dem can hide from people. Dem does try to use that opportunity to see who gun talk to dem. Anil was one. No matter how dark de night dark he got on he shades. He did fall down one night because he didn’t see de pothole.
It does hide dem eye when dem deh at Cabinet. Some of dem drink de free drinks that BK give dem whole night and de next day dem eyes red like Ole Higue. Sometimes dem does sleep and Soulja Bai don’t even know because dem tun dem face to him but dem eyes close.
Talk half and watch how much politicians does wear dark shades.

Discover more from Kaieteur News

Subscribe to get the latest posts sent to your email.

Latest News