Some crooks hiding behind meeting

Aug 23, 2016 Dem Boys Seh, Features / Columnists, News

Every year something new does come up…It could be a new dance, a new song, a new style in dress and things like that. This time a new style come up in some of dem government ministry and this style is common among all of dem who get ketch in crooked business.
Basil de Willie is one of dem. He did tell dem boys when dem call him earlier this year that dem was trying to sabotage some agreement he had wid BK. Dem boys did hear about de settlement and when dem call him he get vex. He threaten to sue if dem only seh that he reach a settlement wid BK.
People tek he at he word, but couple months later dem find out that even before dem boys call him, de Finance Minister was going to Parliament to get money to pay de first installment in de BK case. If there was no settlement how come dem was going to get money to pay de man?
He did stop answering he phone when people call to ask him why he lie. But he get ketch wid a call from a blocked phone. From de time de reporter identify sheself de man was sheer manners. Then he come up wid this new style. “Sorry Maam. I am in a meeting and I will call you back.” Up to now he can’t call back.
Another reporter call Dicky West to ask bout some drug man he hire to collect GWI money. Now everybody know that drug people good at collecting and dem can understand de appointment. But this man is a manager and dem boys seh he don’t have de qualification fuh de job.
When dem call Dicky, he try out de new style. “Sorry. I am in a meeting and I will call you back.” He and all never call back. Trotty in a meeting; Joe Lin in a meeting; everybody in a meeting when dem boys want to ask dem something bout de trouble dem in.
Nutten like he keeping meeting whole day, because he and all can’t be reached when dem boys want to ask him bout de bond deal.
All this mek dem boys want to know if this set like Jagdeo who use to hide and refuse to call press conference when he get ketch in something fishy. He change since he in opposition and he holding steady press conference.
Dem boys want all of dem to know that dem does keep meeting too, but to plan how to smoke dem out. De meeting does last one hour, suh dem boys got whole day to plan fuh de scamps who hiding behind meeting.
Talk half and wait to see dem boys waiting outside de meeting place.

Discover more from Kaieteur News

Subscribe to get the latest posts sent to your email.

Latest News