Soulja Bai getting push to deal wid he vampires

Aug 20, 2016 Dem Boys Seh, Features / Columnists, News

Dem got animals that does hide when de sun come up. Dem is de animals that does behave like vampire. Guyana got people who does behave like dem same vampire. This week dem boys see nuff of dem.
Of course that is nothing strange. Fuh years Jagdeo use to behave like a vampire. When he get ketch he use to run and hide and de people he hide most from was dem reporters. Now de same thing happening. Is like if he lef a curse in de government.
Nuff people decide to hold press conference this week.
At de same time dem same people had things swirling over dem head and just as dem boys expect, dem vampires run and hide. Jagdeo was chief among dem. He was to hold a press conference but when he hear that dem reporters got some serious questions fuh him, he disappear.
He wasn’t de only one. Joe does hold a press conference after de Cabinet meeting. This time dem had nuff questions and he couldn’t send Trotty because from de start, Trotty tell dem that he didn’t able answer fuh some of de things dem do. As expected, de press conference call off, suh dem reporters couldn’t ask questions about Nutten.
Dicky West also call a press conference and like all de others he had couple questions to answer. He didn’t run and hide, but he put out de coffin bearers fuh send de message that he wouldn’t deal wid anything other than wha he call dem to talk about. Dem boys seh that reporters get soft; was like if dem didn’t trust de cross in dem hand.
Dem sit down and hear all wha Dicky had to tell dem. When he done, not one of dem walk up to him and still ask dem question. Dem want to know what he doing wid fuel import and export licence. He ain’t got no oil well and he ain’t even got a fuel tanker.
A few months back dem boys did meet wid Soulja Bai and tell him that people talking how although dem vote fuh a change, he people giving dem an exchange. This time dem gun meet wid Soulja Bai and whisper fuh he bring out he manicole broom and garlic.
Talk half and watch how Soulja Bai gun deal wid de vampires around him.

Discover more from Kaieteur News

Subscribe to get the latest posts sent to your email.

Latest News