Soulja Bai search fuh wha ain’t deh

Aug 16, 2016 Dem Boys Seh, Features / Columnists, News

Somebody always causing trouble fuh Soulja Bai. Nutten cause nuff problem fuh him and all because he decide to sit down and listen to de man when de man explain that he got to save money. De way how he put it would mek a scientist proud.
De man write down some figures he get from Babbie and then he match dem wid figures he get from Larry, but he lef out de fact that Babbie bond was finished long ago and that Larry bond couldn’t even get ahead without money from de government. Soulja Bai didn’t even ask bout de floor space.
Jagdeo sit down and decide to test Soulja Bai to see how smart he is. He buy four pig and he paint 1, 2, 3, and 5 pun dem back. He loose dem in Ohh Pee compound. Up to now Soulja Bai got he security searching fuh number four. Dem promise to break down de building in case de pig deh under de building.
That is not de only thing that got dem boys thinking that anybody can fool Soulja Bai. Dem settling court matters and giving Soulja Bai de excuse that dem woulda lose de court case and woulda pay more than dem settle for. Soulja Bai tek that and he defending he Minister.
Now people believe that dem got kickback in all them arrangements to settle. He also got a problem wid all dem people who shutting out de local farmers. Imagine wid all dem coconut trees Guyana importing coconut water. Dem importing tamarind balls and all dem things.
Now every time people buy dem imported things dem actually helping de foreign farmers. Guyana farmers ketching dem tail trying to sell wha dem plant, and people running overseas to buy de same thing from foreign farmers.
Of course dem boys know that everybody want to mek a dollar. It mean that de foreign people packaging de things cheaper than dem in Guyana. Now we don’t even know if de coconut water that we import mix wid pipe water, but we bringing it in and punishing de locals.
If de locals packaging dem products dem sure that dem local stores wouldn’t buy. But it worth a try.
Soulja Bai can’t ban because of de Caricom treaty, but he can do something. He can ask de farmers to watch dem production cost and stop trying to sell fuh too much money. Dem boys always seh that a slow cent better than a quick dollar.
Talk half and hope that we get some sense.

Discover more from Kaieteur News

Subscribe to get the latest posts sent to your email.

Latest News