Sherod plan to boss Park King

Jul 21, 2016 Dem Boys Seh, Features / Columnists, News

De deputy Mayor feel that he got to fight all de big ones in de council. Is like boxing. Dem have a champion, then dem have de number one and so on.
De Deputy Mayor deh all de way down de rating and de Mayor and Park King mek he realize wheh he deh. Dem tell de man that he wuk is voluntary but de rest of dem in de ratings getting pay.
De Duncan boy claim how he had no choice but to ride he Big Ben. Dem tell him that he got to sit down in de office all day. Now that is one volunteer who don’t have a choice. He can’t do no other wuk and all he getting is a stipend.
After he talk he mind yesterday, de Mayor decide to give he a chance to sit down in she chair. She leffing de country.
Dem boys seh that Sherod can park he bicycle where de Mayor does park she car. He don’t know if he can sit in she office but he know that he can give instructions to Park King.
He can even sign as Chase-Green. And he can call emergency meeting. That is what dem boys want to see.
Just like how dem boys want to see when de Assistant Superintendent gun get charge fuh telling lies to de police.
This is de man who tell de big ones that he check de computer hard drive and he see how certain people mek all dem minutes pun a certain day.
Everybody seh that is time jail pass. One woman faint because dem boys call she name. Now she smiling. Somebody get de same Assistant Commissioner to seh how he ain’t sure wha he see when he check de computer.
De Chief investigator ask him if he change he spectacles. He seh “No”. Dem ask him if he was sleeping when he check de computer de first time and he seh he not sure.
Dem boys believe that somebody slip him a bright change. Money can affect anybody memory and it affect this fella memory.
Talk half and wait fuh de bombshell.

Discover more from Kaieteur News

Subscribe to get the latest posts sent to your email.

Latest News