Dem boys seh...Is sheer faking and pumping going on

Dem boys seh…Is sheer faking and pumping going on

Jul 11, 2016 Dem Boys Seh, Features / Columnists, News

Bogus documents and forgery tek over nuff government office. If is not one forgery is another. People now forging meeting. Just like wha NICIL do other people reporting on meetings that never tek place. And dem got minutes to show, just like NICIL.
Jail facing de people who forge minutes in NICIL. Dem boys want know if jail can’t face dem in other institution.
Dem boys talk to some Board members who seh dem never been to any meeting wheh de meeting focus on knocking off people. Since then dem boys call in a detective to investigate this meeting. And dem find out nuff thing.
Dem find out that C fuh Satar been pun leave when de new Chairman tek over. This man ask fuh an Audi. When C fuh Satar seh dem ain’t got none he ask if any been pun de wharf. No Audi was on de wharf so de Chairman ask fuh a Mercedes Benz. C uh Satar had one and he tell de officer to hand it over to de Chairman. De officer decide to send a Premio.
Dem detectives seh that de chairman got a memory like an elephant and he got timing. When he think de situation settle he fire de officer who send de Premio.
Then de detective discover something else. Dem find that other people hiding things. De other day de police had a route march to celebrate the 177th anniversary of de force. That is wheh dem boys see people trying to hide something.
Rum Jattan and C fuh Seelall was tekking de salute. When de first unit pass everybody see how dem march in time and dem look neat. When dem look pun de saluting dais dem see two big belly. Rum Jattan had one and C fuh Seelall had one.
That is when dem boys see these two men trying to hide dem belly. And dem nearly dead because people can only hold in dem belly fuh so long.
In de long run it look like a belly pumping exercise. When C fuh Seelall pump out, Rum Jattan haul in. And de people marching left (because Rum Jattan deh pun de left) right because C fuh Seelall dun de right. So when de troops marching left-right, Rum Jattan and C fuh Seelall pumping left-right.
Talk half and look out de fakes.

Discover more from Kaieteur News

Subscribe to get the latest posts sent to your email.

Latest News