Minibus does mek young gyal get hot

Jun 23, 2016 Dem Boys Seh, Features / Columnists, News

Dem minibus drivers eyes pass people and de police eyes don’t see wha dem suppose to see. Yesterday a Kitty minibus full of young schoolgirls end up in a gas station. De driver and de girls drinking Guinness and having fun.
Dem boys see when de bus pull in de gas station. De number was BTT 7944 and was a Kitty minibus. De girls had to use de bathroom and de driver couldn’t stop dem by de side of de road.
De police been pun de road and how dem ain’t see this dem boys don’t know.
That is not de only time de police had problems seeing wha happening. Dem didn’t see when some people park dem car at de stadium and other people break in dem vehicle and carry away wha ain’t belong to dem.
Dem Trinis was enjoying what didn’t belong to dem, too. Dem use to mek Guyanese buy things in de duty free shop in Guyana an when dem meet to Trinidad, de Trinis use to tek away de things. Dem boys use to see nuff of dem drunk at de airport, sporting pun de likker that de Guyanese buy.
All good things must come to an end. Soulja Bai seh that he done wid de Trinidad plane. Of course de same airline mek most of its money from Guyana. De company does charge Guyanese to travel to Trinidad de same money dem does charge Trinis to travel to de States. Dem boys was prepared to done de dance.
De Trini plane see de money going away and all of a sudden it can mek people pack dem likker and whatever dem buy in de duty free store in dem luggage.
De happy living done fuh now but dem boys suspect something else. When de bag pack so tight how de airline gun disarrange de operation fuh get out one bag?
Somebody talking to a fool but de fool ain’t listening.
Talk half and look out fuh dem hot young gyal and dem minibus operator.

Discover more from Kaieteur News

Subscribe to get the latest posts sent to your email.

Latest News