Dem boys seh...De King got GT picking fare

Dem boys seh…De King got GT picking fare

Jun 13, 2016 Dem Boys Seh, Features / Columnists, News

Jagdeo was an excellent teacher. He was de best de country ever produce. Today de whole of Guyana seeing his students and poor people suffering.
Remember Digital Technology, de company that was issued two govt contract to supply computers to de Ministry of Education? Shake Bax was de Minister then.
De address fuh this company tun out to be a barber shop in Brooklyn. It didn’t have a computer fuh record de customers. That was fake. Jagdeo was president and dem boys want to know if he tongue did fall out because he never seh nutten.
Royston de King of de City was reading, seeing and learning all de tricks and scampishness that was going on under Jagdeo.
Dem boys see de Deputy Mayor seh de city council give out parking meter contract to a company similar to de barber shop company.
This company don’t have no record of even installing a thermometer to check somebody temperature.
De King of City give dem de key to city fuh do wha dem want wid we. He allow dem to put down parking meter and no rate ain’t fix yet.
Is like a man go in bed wid a prostitute without knowing she fare. De King of de City put Georgetown in that position. Now is everybody fearing or picking fare.
Dem boys seh when dem read wha de Deputy Mayor seh bout de deal is two thing dem boys conclude. Is either he selling out de city to another barber shop company or he turning de city into a whorehouse.
De things that some of dem doing mek dem boys conclude that some of dem in power go in hungry. Dem was only waiting fuh dem turn.
Dem boys betting dem last dollar that this project wha never been through a tender process would never get a comment from Jagdeo, that scamp because he created these conditions.
He taught everybody in his party and dem out of his party learn from he students. All of dem is now friends.
Dem boys watching to see wha move Soulja Bai gun mek. Carol although she was power drunk and get Soobah, never tek de council to this level.
Talk half and hope Soulja Bai knock off de King.

Discover more from Kaieteur News

Subscribe to get the latest posts sent to your email.

Latest News