This dream gun come to past

Jun 12, 2016 Dem Boys Seh, Features / Columnists, News

People believe dream does come through. Some of dem does go to sleep wid things pun dem mind and when dem wake up dem does seh is dream.
Friday night, de Waterfalls boss man went to bed early because he was tired. He was keeping wake every night fuh he padna and best reporter, Dale Andrews.
He come to wuk early, Saturday, and tell de entire staff he had this dream. And de dream look real because he see real people.
He seh he dream de director of de mental institution does release three inmates who recover to de best of de director satisfaction.
De nurses put de three men in a showcase suh de director can visually evaluate dem for a few minutes before he talk to dem.
He see one of dem shadow boxing, one staring at he clothes and de other trying fuh see de back of he pants.
De director call de shadow boxer and ask him, “What is your name?” and de man seh Robeson.
“Wha you gun do if I am to release you in de general public?” ask de director.
Robeson seh, “I gun do de same thing wha you see me doing just now—shadow boxing—because if I don’t do that I gun run mad.”
De director shy he back wheh he been. Then he call de man wha watching he close.
“Wha you name?” De man seh ‘Ten Edghill.”
“Tell me wha you gun do if I am to release you from dis institution.”
Ten Edghill seh, “Sir when I go out I gun buy some nice clothes fuh me wife.” De director she, “Eh heh. Wha nex?”
“I gun dress she up and put she fuh lie down pun de bed.”
De director seh, “Sounds good. Then?”
“Sir I gun pull off she underwear, pull out de string from de waist and fly a kite.”
De director seh, “Don’t even think about loosing dis one. Send in de other one wha trying fuh bruck he neck to see he backside.”
“Wha you name?”
“My name? Bharrat Jagdeo.”
“Tell me wha you would do if I am to loose you out in de general public?”
He seh, “Director. I gun go out and find a wuk. I gun wuk very hard.”
“Wha you gun do next?”
“I gun save all me money.”
De director seh, “Sounds good. Wha you gun do wid all this money?”
“Sir, I gun buy a new Bee Tee because this one, got a big hole.”
Talk half and hope that this is one dream gun come true.

Discover more from Kaieteur News

Subscribe to get the latest posts sent to your email.

Latest News