Bring out de hang man from retirement

May 31, 2016 Dem Boys Seh, Features / Columnists, News

Dem boys know bout crime but dem can’t even imagine a crime like this. Not even Fine Man who chop off Gurple head was so bad. At least people believe that Gurple do something to Fine Man.
De only crime worse than this one was de one wheh dem soldiers kill de boy going to Bartica wid a box of money. Dem did throw de man in de whirlpool in de river, tek dem boat and keep circling him to see when de water gun suck him under. When he wasn’t going down dem shoot him and watch him sink. Wha mek this killin de worse in dem boys book is because military people got to protect everybody.
This set corner five fisherman, throw de captain overboard, tek de other four and use dem to rob two other boat and fetch de goods over to dem boat.
When dem done dem tie up de four to de anchor of de boat and dump dem overboard. One stick in a fishing net. Dem boys seh de Man above don’t sleep. He mek de captain survive to tell de tale.
Dem boys want ask Soulja Bai to hand over dese uncaring murderers to dem. If not, at least try dem in town in front Justice Navindra Singh and bring de hang man out of retirement.
Dem boys notice that this whole pirate thing begin under Jagdeo. Is he create de condition. From small he use to go to Mahaica foreshore and tek way fish from dem poor fisherman. That is how this pirate thing start. Today it get out of hand.
Dem boys notice that Jagdeo never visit any of dem people who family lost dem love ones to pirates. Dem hope that he don’t mek de mistake and go to anybody this time.
No man’s life, property or liberty is safe once Jagdeo and Joe ShanL is around. You very safe wid Donald Dumb and Sam Blind. Soulja Bai is a good bai too and de people who safe is all dem crooks wha de audit expose.
Talk half and join dem boys in saying a li’l prayer fuh dem fishermen and dem families.

Discover more from Kaieteur News

Subscribe to get the latest posts sent to your email.

Latest News