Latest update April 28th, 2026 12:30 AM
BaiShan deh pun back to front business
Freddie, de man who like write about anything till he does end up writing nutten, got two cat and a dog that he calling he children. He cuss de coalition govt, he cuss City Hall until ee nearly cuss heself.
He tell de nation, yesterday City Hall got people cleaning de filthy city that Jagdeo lef and dem don’t have protective gear to protect dem from being poisoned or get skin disease.
Dem boys seh Freddie watching too much American news. He think everything in America should be in Guyana. He think Guyana should develop all de American attitudes and lifestyle.
Just now people gun see a column cussing Soulja Bai to put air condition in all dem jails in Guyana, de mad house and in all dem school, just like America.
He did spend a three-day inside Brickdam and he had to fan dem boys wid cardboard just to avoid leaving there pregnant.
Gerry is another one. He getting a dose of he own medicine. When Jagdeo give him Duke Lodge fuh next to nutten and then tek away de next door building from Tamesh who did bid higher than Gerry.
Today, dem boys see Mike de Carrila giving him a dose of ee own medicine to smell and taste. He want bully de man; he think Jagdeo still in power fuh tek way de whole airport and give him. But he lie.
Soulja Bai is in charge and he don’t like to see advantage, corruption and foolishness. And dem boys like him fuh that.
Is not Gerry alone trying to bully ee way around. BaiShanLin want try it, too. BaiShanLin bribe some of dem in de Pee Pee Pee and get concession that actually mek dem own Guyana.
Now he want bully Soulja Bai because he can’t bribe him. This man got de nerve to write UN complaining how Soulja Bai administration tekking away he thing wha he didn’t pay for.
He also threatening de relationship between Guyana and ee country—China. Soulja Bai did seh last night he nah deh suh; he not looking fuh dem kind of relationship. He got a wife and children.
Whoever start that type of relationship wid BaiShanLin, leh dem go back to dem same person. And if Cousin Joe Shan want to stay in that family and mek dozen that is he business.
Talk half and watch dem back to front relationship
Share this:
Discover more from Kaieteur News
Subscribe to get the latest posts sent to your email.