Latest update January 11th, 2026 6:15 PM
Dem boys seh…People talking and runnin
Feb 29, 2016 Dem Boys Seh, Features / Columnists, News
When people realize that dem gun get ketch at something dem does run away. That is why Guyana got so much wanted men. All of dem do wha wickedness dem do and as soon as people start to zero in on dem, is sheer speed.
Dem boys talk bout trawlers smuggling fuel to Guyana. De paper didn’t even come off de press when even fishing boats mek a run. By de time de authorities land fuh check, all dem fishing boat gone.
Some of de people who been pun de shore tekking a drink see a sailor running to dem. Dem think something happen pun de boat. Is when de sailor tell dem wha happening people see men lef dem drink and run.
Is a good thing de barman ask dem fuh pay in advance otherwise he woulda deh running behind dem too.
And is not only dem running. De police closing in pun de people who kill Crum Ewing. Suddenly Donald people put out a statement that claim a policeman doing bad things. Dem call de policeman name and dem claim how dem got he pun tape.
Dem boys want to know if dem got him on tape why dem ain’t send de tape to Seeall? That would be powerful evidence and dem ain’t got to put out a statement. And while all that going on Jagdeo quiet like if he tongue drop out.
Then a drug man come out loud and clear and claim how he is a drug dealer. This was a man who Uncle Sam did want but de law stop dem. Since then, de government change de law but de man come out and talking. He claim how CANU got people who big in de drug dealing. Dem boys always want to know how drugs does still pass through the airport and get ketch in Uncle Sam.
De drugs does end up on de plane, according to this drug dealer but de man ain’t calling name. If he call name then he gun help bruck up de gang. But all of that could be stopped if only de tax people visit all of dem who suddenly get rich. But Jagdeo mek nuff of dem tun dem face because he suddenly display some riches that he pay couldn’t give him.
Rohee claim that he save every cent he wuk for from de day he start wuk but dem boys know that wid all he savings he couldn’t get so much money.
Talk half and wait fuh more squealing.
Discover more from Kaieteur News
Subscribe to get the latest posts sent to your email.