Latest update April 12th, 2026 12:50 AM
Luncheon could cut off nuts fuh knee cap
A man does thief because he think he can get away wid it. People does walk anyhow pun de road because dem know that dem drivers frighten to knock dem down. Some man does knock dem wife because dem know that she wouldn’t seh nutten.
De Chat-3 use to sit down pun Brickdam and whistle at dem young gyal who pass by. He didn’t care if dem was school gyal or road gyal; once dem young he would sit and whistle. One day he wife sit down and he keep whistling. When he ketch heself he ask she if she vex.
De woman seh ‘Nah. I does see dem dogs chasing cars and dem can’t drive.”
Luncheon is de same thing. He apply fuh get back he doctor’s licence. Of course, he was a great kidney specialist but he give up that to tun politician. Now that he out of politics he want to tun doctor again.
De man end up cussing. He claim that some of de people who he train now refusing to help him. But that was when he was a doctor; and besides he can’t be sure is de same people.
Dem boys been deh when SOCU call he in fuh talk to dem about certain money. Luncheon, as a politician did sign nuff documents fuh people move about money. He sign fuh NIS money move to CLICO and he sign when NIS was to lend money to de Berbice Bridge. That is how SOCU decide to check.
Dem boys seh that de SOCU man give Luncheon a document that he, Luncheon, sign. De man ask Luncheon to read. Dem boys seh was a case of tricky and trawnie. Luncheon got two spectacles. He put on de first one and claim he can’t see. Then he put on de second one. Again he claim that he can’t see.
De SOCU man tell him that if he can’t see wha deh in front of him now dem want to know how he gun send in application fuh doctor licence fuh wuk pun de local market.
One man seh that thing fuh cry got people laughing. Dem boys seh if Luncheon get de licence, since he can’t see he might have to feel. That is when he gun cut off people nuts fuh dem knee cap or he might cut somebody tongue fuh dem heart.
Talk half and hope Luncheon fix he eye fuh read dem SOCU documents.
Share this:
Discover more from Kaieteur News
Subscribe to get the latest posts sent to your email.