Latest update February 3rd, 2026 12:40 AM
Latest News
Dem boys seh… Guyoil provide nuff free gas but only fuh de clique
Jun 25, 2015 Dem Boys Seh, Features / Columnists, News
When de opposition was talking bout how de government hiding things nuff people use to think was joke. Of course, de government people use to laugh. Some of dem use to seh, “Talk all you want, nobody ain’t gun believe.”
But Soulja Bai and he team know wha dem was doing. Dem vote against de Amaila Falls project because dem boys tell dem that de plan was to talk about one sum but to increase de real cost later on. De taxpayer woulda been paying through dem nose.
Jagdeo start that project at US$500 million. By de time he done it did reach US$850 million. But that wasn’t de real price. Donald jump and talk how de opposition cut de project. He didn’t tell people that de hydro project woulda give de country hydro-seed— that severe swelling below the waist for men.
Dem boys run a check pun de airport expansion project and de same thing that dem suspect wid de hydro project is de same thing dem find. Was another hydro-seed. Jagdeo tell de people one cost and poor Donald, without understanding wha people talking about, jump and repeat de same thing.
Donald seh that de airport project cost US$150 million but de real cost was closer to US$250 million. Dem was hiding de hydro-seed.
But that was only part of de story. All who had car and who know a Minister use to get free gas. Dem use to use de Guyoil gas station like dem personal property. No wonder dem had so much car pun de road before de election. Since de election done nuff of dem car park. And de rest wha ain’t park get send back to de government. Some people try fuh thief dem but dem get ketch.
Some of dem get spray over; some cover up under tarpaulin; some got new number plate and some just deh under somebody bottom house.
No wonder people couldn’t get a raise in pay. De money had to buy gasoline fu all dem Minister, dem family and dem friends. Soulja Bai seh that dem gun pay fuh all wha dem use. He checking de records.
Talk half and wait fuh see some of dem pawn dem house fuh pay de gas bill.
Discover more from Kaieteur News
Subscribe to get the latest posts sent to your email.