Latest update June 16th, 2026 12:40 AM
Dem boys seh…Jagdeo is a bareface man
Jagdeo is a shameless big man. Why anybody, even a mad man, pick he fuh guh and monitor election in any part of de world in any country is a mystery.
Fuh 13 years he rule Guyana and de same thing he blame de people in Sri Lanka for, he do wuss. He never hold local government election in Guyana; he never do one transparent project.
He sit down and watch corruption get wuss than at any time in de history of Guyana. He watch it tek root lef, right and centre.
Down to li’l children corrupt now. And he go to Sri Lanka fuh monitor free and fair election. Is either somebody dumb, deaf or plain blind. It had to be that dem never hear bout Jagdeo.
Dem boys seh that most of de people in Sri Lanka don’t talk or read English.
In he report, Jagdeo blame de Sri Lanka people fuh abusing de state media; he do wuss. De opposition couldn’t get a word pun de state television station.
Radio was wuss. Jagdeo use de radio to shut out de opposition in he country. Whole day people seh that dem could hear he voice talking a skundle ah bunt.
De people at de radio had to send he de radio, TV and de newspaper programme every morning before dem do anything. Michael Gordon, Neaz Subhan, Mark Ramotar and Nigel Williams seh suh.
Jagdeo is also a bareface man. He tek de Suriname people money and when de court tell he fuh give back de people dem money, he tell Anil fuh tell de people in Suriname that de government don’t have any money at present.
Dem boys seh if was a Guyanese dem had to repay, Jagdeo mighta negotiate fuh a cut and he woulda instruct Nandlall fuh pay right away.
But because is Suriname and de man don’t talk English, Jagdeo don’t know how to negotiate. That is why de people can’t get dem money.
Talk half and watch how Jagdeo de get power drunk.
Share this:
Discover more from Kaieteur News
Subscribe to get the latest posts sent to your email.